af dórunni...

Mexíkósk kjúklingasúpa

2011-11-05T13:02:00.002Z

Þessi klassíska mexíkóska kjúklingasúpa hefur fyrir löngu fest sig í sessi hjá fjölskyldunni og hefur verið á boðstólum jafnt í veislum eða hversdeginum.

Hráefni

2 laukar, sneiddir

3 hvítlauksrif, smátt söxuð

1/2- 1 rautt chilli, smátt saxað

1/2 tsk chili krydd

1/2 tsk cumin

1/2 tsk malað kóríander

4 kjúklingabringur, skornar í munnbita

3 dósir tómatar, maukað í blandara eftir smekk

7 dl kjúklingasoð

2 tsk Worchestershire sósa

Aðferð

Gljáið hvítlauk og lauk í smá olíu í stórum potti, bætið svo öllu út í súpuna nema kjúkling og látið malla nokkra stund, uþb 20 mínútur.

Bætið kjúklingnum út í og sjóðið í um 10 mínútur.(Sumir steikja kjúklinginn fyrst og bæta honum svo út í).

Smakkið til og bætið við kryddi eftir smekk.

Borið fram með e.t.v. nachos, rifnum osti, sýrðum rjóma og avocado.

p.s. vel má gera súpuna ódýrari með því að helminga kjúklinginn og setja 1 dós af kjúklingabaunum í staðinn!
Tilvalið er að nota kjúklingaafganga eða tilbúinn kjúkling í þennan rétt.

Gamla tónlistarmyndbandið okkar fundið

2010-11-30T22:17:00.000Z

Good times :)

Eru erfðabreytingar hættulegar?

2010-11-03T08:43:00.000Z

Við vinkonurnar höfum skeggrætt erfðabreytingar að undanförnu.
Ein úr hópnum prófaði hina íslensku undradropa EGF Bioeffect og var yfir sig hrifin. En þeir eru einmitt unnir úr erfðabreyttu byggi, og það eru því margir frekar hræddir við að prófa það.

Ég er að eðlisfari frekar hrædd við öll inngrip í náttúruna og forðast því allt sem er erfðabreytt eins og heitan eldinn. Undradroparnir góðu verða bara að bíða :)

En ég fór að fræðast um þetta á veraldarvefnum og komst að því að það er ofsalega mikil framleiðsla í heiminum á erfðabreyttum matvælum! Sérstaklega í ljósi þess að margar rannsóknir hafa sýnt neikvæðar niðurstöður og hversu óútreiknanleg áhrif þetta getur haft á náttúruna.

http://www.erfdabreytt.net/
frétt úr Bændablaðinu um bann í Frakklandi - en þar kemur fram að erfðabreytt sé mikið notað í að fóðra dýr - það veldur mér áhyggjum - þá erum við raunverulega kannski að neyta erfðabreyttra matvæla ef dýrin sem við borðum átu erfðabreytt! http://www.bbl.is/index.aspx?GroupId=39&TabId=47&NewsItemID=2091&ModulesTabsId=188
frétt úr Bændablaðinu um að erfðabreyttar plöntur séu farnar að dreifa sér í Kanada http://www.bbl.is/index.aspx?GroupId=39&TabId=47&NewsItemID=5320&ModulesTabsId=188

Mæli enn og aftur með Google Reader

2010-10-28T21:38:00.000Z

Það er svo þægilegt að geta gerst áskrifandi að vefsíðum og fá þannig þegar manni hentar að vita nákvæmlega hvað hefur bæst inn á síðurnar sem þú fylgist með síðan þú last þær síðast.

Svo ég mæli með Google Reader!

Hér vinstra megin setti ég lítið widget sem sýnir síðustu færslur sem ég hef miðlað þar :)

Inspired By Iceland

2010-06-03T09:22:00.000Z

Inspired By Iceland

Sumarið er tíminn...

2010-05-10T07:11:00.001Z

Sumarið er tíminn..., originally uploaded by Dóra & Víðir.

Yndisleg helgi er að baki, með dásamlegu veðri.
Lífið getur ekki verið betra ;o)

Leitin að hinni fullkomnu pönnu

2010-05-04T23:03:00.001Z

Þessa dagana leita ég að hinni fullkomnu steikarpönnu!

Þetta hljómar sem ósköp smávægilegt verkefni... af hverju ekki að skella sér í IKEA?
Reynsla okkar hefur bara sýnt okkur það að þessar ódýrari pönnur duga bara ekki lengur en í 1-2-3 ár, og mér skilst að dýrari Teflon/keramik pönnur endist ekki mikið heldur. Svo stálpanna skal það vera en tegundirnar eru ótal margar og ég get látið hvaða sölumanneskju sem er sannfæra mig um að þeirra panna sé best.

Við Víðir erum algjörlega búin að gefast upp á þessum eltingarleik við ódýrar pönnur, svo nú höfum við tekið þá ákvörðun að fjárfesta í almennilegheitum. Þó hún kosti á bilinu 10-20 þúsund þá verður það örugglega vel þess virði.

Meðmæli óskast!
Dóra panna ;)

Góðum áfanga náð

2010-05-04T00:09:00.001Z

Það var svo góð tilfinning sem hríslaðist um mig í morgun, þegar ég hringdi í Víði til að segja honum að nú ættum við hverja einustu beyglu á bílnum okkar. Loksins! Loksins kláruðum við að greiða upp bílalánið!
Og við látum okkur sko ekki dreyma um að taka lán fyrir nýjum bíl, þvert á móti hljómar það eins og hin versta martröð... grínlaust.

Þetta er eitt stærsta skrefið sem við höfum náð í átt að markmiði okkar að skuldleysi (f.utan húsið) - nú stækkar skóflan okkar um 60 þúsund á mánuði, svo ég bind vonir við að hlutirnir fari að gerast hratt.

Skál fyrir því!

Sungið á föstudagskvöld

2010-04-28T08:17:00.002Z

Hljómlistarfélag Hveragerðis stendur fyrir vinnustaðakeppni á Hótel Örk á föstudagskvöldið sem endar svo á dansleik frameftir kvöldi. Það er víst sú hefð að á kosningaári sé skorað á framboðslistana að stíga á stokk, og fyrir hönd A-listans ætlum við Jóhanna Ýr að þenja raddböndin. Það er 80's þema, svo það verður fjör haha.
Þið bara verðið að mæta kæru vinir og hvetja okkur til sigurs! ;)

Fyrsti kynningarbæklingur okkar frambjóðendanna kom út í síðustu viku og þið getið skoðað hann hér.
Uppsetningin ætti að höfða til allra, bæði faglegur og frumlegur!

Þið eruð svo öll boðin í kaffi á laugardaginn því þá opnum við kosningaskrifstofuna. Hún verður staðsett á besta stað í Sunnumörkinni, í rýminu við hliðina á Bónus í Hveragerði.

Heimalöguð aspassúpa

2010-04-24T19:07:00.000Z

Í dag eldaði ég mína fyrstu aspassúpu!
Sumir gætu rekið upp stór augu en ástæðan fyrir því er sú að mér líkaði aldrei neitt sérstaklega vel við þessar súpur þegar ég var barn.
Ég datt óvænt inn á uppskrift að heimalagaðri aspassúpu á www.hvaderimatinn.is og þar sem ég átti aspasdós þá var tilvalið að reyna þetta. Mér hefur alltaf verið illa við pakkasúpur og þetta er fullkomin súpa fyrir slíkt fólk ;)

Uppskrift:

1 löng dós niðursoðinn aspas (ca 400gr)
330 ml matreiðslurjómi
380 ml Vatn
25 gr hveiti
25 gr kjúklingakraftur (kjúklingakraftur fyrir 600ml)
örlítill nýmalaður svartur pipar
smá Maldon salt

Notið vökvann úr dósinni og hellið honum í pott ásamt 330 ml af vatni, kjúklingakrafti og matreiðslurjóma.
Látið suðuna koma upp og leyfið þessu að malla í allt að 10 mínútur.
Hristið saman hveiti og restina af vatninu. Hrærið stanslaust á meðan þið hellið þessu í pottinn í mjórri bunu. Annars geta komið kekkir.
Bætið aspasnum út í og sjóðið í nokkrar mínútur í viðbót.
Saltið og piprið eftir smekk.

Gott er að bera fram heit smábrauð með súpunni.

Samsafn glæsilegra ljósmynda af gosinu í Eyjafjallajökull

2010-04-21T08:55:00.000Z

Hér hefur Boston Globe safnað saman mögnuðu safni af ljósmyndum af gosinu... það mætti segja að þetta væru "best of the best".
Flestar þeirra hef ég ekki séð áður... þær eru eftir íslenska sem erlenda ljósmyndara.

Eyjafjallajökull ljósmyndir

Gleðilega páska!

2010-04-05T12:10:00.001Z

Afmælismæðgur

2010-04-03T13:39:00.000Z

Sá tími ársins er kominn og nýliðinn að við mæðgur verðum árinu eldri :)
Ég þann 23.mars og Kamilla þann 30.mars með tilheyrandi fjölskylduboðum og gleði.
Svo hafa börnin bæði verið veik undanfarið svo það er ekki annað hægt að segja en að það sé búið að vera nóg að gera undanfarið.
Mæli annars með þessu páskaföndri svona á síðasta sprettinum fyrir páska!

sniðugt, málað með TE

2010-03-04T20:59:00.000Z

Leiðbeiningar hér ;)

Fyrsta skautaferð Kamillu

2010-02-24T09:00:00.000Z

Á sprengidag fórum við Kamilla Líf með þeim mæðgum Dagnýju og Helgu Sigríði í Skautahöllina!
Stelpurnar voru svo spenntar og tilhlökkunin yfirgengin, loksins var stundin komin.
Kamilla Líf kom mér svo svakalega á óvart. Stúlkan sem er lofthrædd og hefur aldrei prófað neins konar skauta/skíði óð út á svellið á meðan ég var enn að festa á mig skautana! Ég missti alveg andlitið, því ég hélt hún væri að bíða eftir mér og var búin að búa mig undir að þetta yrði henni erfitt... en nei, daman bara komin af stað og búin að ná sér sjálf í hjálpargrind... ég bara átti ekki til orð. Fékk svo að heyra það að ég mætti ekki hjálpa til, hún gat þetta greinilega sjálf og lét mig heyra það ef ég fór að skipta mér af - "þú lætur mig bara detta, mamma!"
Ótrúlega skemmtilegur dagur. Hún var svo ánægð, hló þegar hún datt og reis jafnóðum upp aftur. Hún þurfti svo enga hvatningu til að prófa að sleppa hjálpar"dekkjunum" eftir nokkra stund...
Ekki spurning að við munum reyna þetta aftur fljótlega!

Fyrsti bolludagur Tristans

2010-02-22T09:00:00.000Z

Súkkulaðifésið, gómsætar bolludagsbollur

Fyrsta gæludýr Kamillu

2010-02-20T07:00:00.000Z

Má ég kynna hann Ólíver?
Hann er hið fullkomna "gæludýr": hljóðlátur, snyrtilegur og tekur lítið pláss.
Var ég búin að nefna hann hann er maríubjalla?

Prentaðar gamaldags dúkkulísur (Betsy McCall)

2010-02-18T07:00:00.000Z

Sjáið þetta, dásamlegar eru þær!

Ég veit ekki með ykkur en ég man eftir að hafa átt dúkkulísur og leikið mér með þær.
Síðan finnst mér eins og þær hafi dottið alveg út úr búðunum og það var ekki fyrr en síðasta sumar sem ég rakst á ferlega sætar gamaldags dúkkulísur í Snúðum & Snældum á Selfossi.

En hér eru þær á netinu.
Prentið þær út og gefið dætrum og frænkum... ég er viss um að þær kunna að meta það!

Freistandi berjakaka

2010-02-13T17:48:00.000Z

Þessa yndislegu og frísklegu köku bauð ég ektamanninum upp á í dag. Hún rann ljúft niður volg með vanilluís og við borðuðum á við þrjá, nammm.

Ég tók í leiðinni út smá mont út af bláberjunum sem ég notaði í kökuna. Því síðasta haust var mamma svo góð að gefa mér ber sem hún hafði týnt en ekki haft not fyrir, og ég lausfrysti þau. Og hér koma þau sér vel, lausfryst og dásamlega girnileg. Eilítið súr eins og þessi íslensku eru stundum, en þess vegna er sætur ísinn líklegast betri kostur heldur en rjómi sem meðlæti.

Tristan bættist svo í hóp elskenda þessarrar köku eftir blundinn sinn, og það er skemmst frá því að segja að hann borðaði ekkert minna en við!

Uppskriftina fann ég í eldra tölublaði Gestgjafans, og hún hljóðar svo:

Freistandi berjakaka

2 dl hveiti

1 tsk lyftiduft

2 dl möndlur, saxaðar

180 g smjör

2 dl sykur

safi úr 1/2 sítrónu

2 tsk vanilludropar

2 egg

2 dl ber, fersk eða frosin

Hitið ofninn í 180°C.
Sigtið saman hveiti og lyftiduft í hrærivélarskál og bætið möndlunum við.

Setjið smjör, sykur, sítrónusafa og vanilludropa í pott og hitið við vægan hita. Hrærið vel í þar til smjörið hefur bráðnað og sykurinn leyst upp.

Blandið þessu síðan saman við hveitið og möndlurnar.

Bætið eggjunum út í, fyrst öðru og svo hinu, og hrærið vel.

Hellið blöndunni í smurt smelluform og dreifið berjunum yfir.

Bakið í 40 mínútur þar til kakan er orðin gullinbrún.

Borin fram volg með ís eða þeyttum rjóma.

fullorðnu börnin

2010-02-11T21:06:00.001Z

Það eru svo mögnuð mómentin þegar börnin koma manni á óvart með orðatiltækjum, frösum, vangaveltum um lífið og hvernig allt svo fúnkerar.

Eins og þegar við mæðgur vorum á ferðinni upp Kambana árla morguns og ég set í geisladisk í rólegri kantinum. Og á meðan Kamillan horfir út um gluggann vellur upp úr henni "Rosalega er þetta fallegt lag mamma. Þegar ég hlusta á lagið og horfi á ljósin frá bænum okkar þá fæ ég bara tár í augun!"

Eða þegar ég fylgdi henni í leikskólann um daginn. Félagi hennar gengur að henni og réttir henni upprúllaðar teikningar, þau brosa og hún gengur frá þeim í hólfið sitt. Þegar ég spyr hana hvort hún ætli ekki að skoða teikningarnar sem var verið að gefa henni þá fæ ég að heyra að hún viti sko alveg hvaða teikning þetta væri. Þetta var sko fjölskyldumyndin þeirra, því hann sé kærastinn hennar. Og hún rúllar út myndinni fyrir mig.. og viti menn, þarna eru þau, kærustuparið og afkvæmi, í framtíðinni. (Svo afsakar hún kærastann og tekur fram að hann teikni bara skrítið fólk svona með strikum (klassískur óli prik)).
Það er sem sagt allt klappað og klárt, framtíðarplönin langt á veg komin!

Barist um móðurfaðminn

2010-02-01T20:56:00.001Z

Tristan getur sjaldan leyft systur sinni að hafa mig út af fyrir sig... þreytt börn í lok mánudags

2009: fyrsta hænuskrefið tekið

2010-01-20T18:07:00.001Z

Ef ég hefði árið 2008 lesið þetta sem ég skrifaði hér síðast um algjört skuldleysi þá hefði ég hlegið og fundist það frekar fjarstætt. Auðvitað finnst manni það fjarstætt af því að það tekur tíma, og þegar fólk er yfirskuldsett með 40 ára fasteignalán fyrir framan sig þá hljómar það eins og einhver fjarlægur draumur.
En ég er sannfærð um annað og er staðráðin í því að það taki ekki meira en 15 ár, vonandi samt ekki nema 10.

Við tökum þetta í skrefum, reyndar algjörum hænuskrefum.
Í fyrsta lagi er nauðsynlegt að vita hvert peningarnir fara og get sett sér plan fyrir mánuðinn. Þetta er mikilvægasti hlutinn af því að vera við stjórnvölinn en eitthvað sem flestir flaska á.
Í janúar 2009 varð ég áskrifandi að PearBudget sem er vefsíða sem hjálpar manni að fylgjast með hverjum aur og snilldin við síðuna er að það er svo auðvelt að fá yfirsýn. Svo eftir nokkra mánuði þar þá sá ég svart á hvítu hvar veikleikarnir voru í eyðslunni og einnig hvernig mynstrið er. Því það er ekki svo breytilegt milli mánaða hversu mikið fer í mat, gjafir, föt, lækni, bensín, viðgerðir og slíkt. Og ef það er breytilegt þá finnurðu út meðaltalið og leggur þá tölu fyrir mánaðarlega svo þú eigir fyrir því þegar kemur að næstu þannig greiðslu.

Aðferðin sem Dave Ramsey kynnir passaði síðan eins og flís við rass þar sem þetta er forskilyrði. Þú þarft að fylgjast með krónunum og skipuleggja áður en mánuðurinn hefst hvert peningurinn á að fara og aldrei eyða meiru en þú færð inn.
Þegar líða fer á mánuðinn kemur auðvitað stundum í ljós að þú áætlaðir of litlu í einn flokk en þá geturðu fært á milli flokka og minnkað við aðra tegund af neyslu -> því bottomlænið er að fara ekki fram úr heildartölunni. Sumir kalla þetta "0-based budgeting".
Þegar þú getur sirkabát fylgt þessu plani án þess að fara í mínus þá er kominn tími til að stíga næsta skref og stefna í áttina að skuldleysi.

Dave Ramsey planið hef ég til viðmiðunar. Við kláruðum skref 1 á haustmánuðum og erum núna frekar stutt komin á leið með skref 2. Skammtímaskuldirnar eru óþarflega miklar hjá okkur og hrikalega þungur baggi um hver mánaðarmót en en ég áætla nú samt að það muni klárast 2011.

Í grófum dráttum eru skrefin 7 þessi:

Safna 125.000 krónum í mini-neyðarsjóð
Borga niður allar skammtímaskuldir með "snjóboltaaðferðinni" (yfirdrættir, bílalán, námslán, etc)
Safna fyrir 3-6 mánaða útgjöldum og þannig fylla neyðarsjóðinn.
Greiða 15% af tekjum í lífeyrissparnað
Safna fyrir skólagjöldum barnanna (svoldið amerískt)
Borga alveg niður fasteignalánin
Safna peningum og gefa peninga

Ég mun í framhaldinu lýsa nánar hvað þetta felur í sér....

Má ég kynna fyrir ykkur vin minn Dave Ramsey!

2010-01-15T21:59:00.010Z

Ég eignaðist vin síðla sumars 2009. Ég heyri í honum hljóðið á næstum því hverjum degi og vináttan blómstrar. Það er kannski einn galli á þessum vinskap, því hann þekkir mig bara ekki baun! Ég er bara ein af þessum milljónum sem hlusta á útvarpsþáttinn hans og hljóðbækur eða les bækurnar hans.

Hann er höfundur bókarinnar My Total Money Makeover sem er ekki ný af nálinni en hefur öðlast þvílíkar vinsældir í Bandaríkjunum á þessum krepputímum, því boðskapurinn hans er einfaldlega þetta kommon sens í fjármálum sem allir vita en enginn fylgir. Til dæmis: að eyða ekki meira en maður á og safna fyrir hlutunum áður en maður kaupir þá. Hljómar einfalt? Ó já! En samt eru allir í vandræðum með þetta!

En árið 2009 var svo stórt fjárhagslega! Því núna loksins erum við 100% við stjórnvölinn og vinnum markvisst að því að verða skuldlaus. Alveg. S K U L D L A U S.
Við munum aldrei aftur taka lán. Ekki upp á krónu. Dásamlegt!

Það besta er samt að ég hlakka svo mikið til! Það verður erfitt og krefst fórna, en þetta markmið mun nást og með hjálp þessa kæra vinar held ég mér við efnið og ætla sko ekki að gefast upp. Því það er ömurlegt að vera skuldari. Ímyndið ykkur hvað þið gætuð gert við allan þennan pening sem mánaðarlega hverfur strax út af launareikningnum - ímyndið ykkur hversu hratt þið gætuð safnað ykkur fyrir því sem ykkur langað í eða lagt fyrir til að eiga digran sjóð í ellinni???!!!
Það er geggjað að vera svona drifinn, ég gæti meira að segja hugsað mér að kenna þetta.

Ef þið hafið áhuga á að kíkja á vin minn, þá er hann auðvitað búinn að búa til bisness í kringum bækurnar sínar á www.daveramsey.com og hér er bókin. Þó hún og allt sem hann kennir er miðað við Bandaríkjamarkað þá er conceptið peningar og það er hægt að beita því hvar sem er.

Áramótaheit

2010-01-13T21:58:00.000Z

Ég er lítið fyrir áramótaheit.. kannski vegna þess að ég tengi það helst við bíómyndir og markmið sem floppa áður en janúar er úti. En markmið almennt, það er kannski annar kapítuli og eitthvað sem maður lærir betur og betur með hverju árinu.
Ég er samt svolítið hrædd við markmið.. óttast kannski að ég muni ekki leggja mig nógu mikið fram við að ná þeim og verða óskaplega vonsvikin og þori þess vegna sjaldan að hafa hátt um markmiðin. En á sama tíma óttast ég svolítið meira að enda sem manneskja sem lifir bara dag fyrir dag og sér lítið lengra en hvert nef mitt nær. Svo ég hef smátt og smátt orðið markmiðadrifnari og er hrikalega sátt við það.

Svo allt í einu eru orðin til markmið fyrir 2010! En skyldi maður þora að nefna þau upphátt?
Kannski ekki hér, en kíkið í kaffibolla og kannski mun bollinn tala....

sunnudagsmorgunn

2010-01-11T21:23:00.000Z

Nýtt ár og ný stelpa

2010-01-07T08:00:00.002Z

Klukkan 7:45 þann fallega vetrardag 7.janúar missti Kamilla Líf sína fyrstu tönn!
Hissa leit hún í lófann og kastaði tönninni snarlega frá sér þegar hún sá að tönnin var örlítið blóðug í rótina. En hamingjuóskirnar dundu á henni og það var ekki lítið stolt stelpa sem trítlaði í leikskólann.
Ég geri fastlega ráð fyrir að tanngatinu verði troðið framan í alla sem hún mætir í dag :)

Þegar við mættum í leikskólann þá dró hún úlpukragann upp á andlit, kallaði svo á Hörpu deildarstjóra sinn og spurði "Gettu hvað ég er með? Það er sko ekki tönn! Því tönnin er í krukku heima!!!".

Nývöknuð og stolt, með pínkulítið gat í neðri góm

Tönnin fræga

Lítil er hún!

rólegheitin

2009-12-29T15:44:00.002Z

Þessi jól hafa verið óvenju róleg og það hefur verið virkilega notalegt.
Í dag til dæmis vorum við að koma frá Flúðum þar sem við vorum í sumarbústaðaheimsókn hjá tengdó, nema hvað við komum bara þrjú heim því dæturnar tvær fengu að vera eftir og gista aðra nótt! Svo það verður áfram rólegt hér á bæ...

Ég tek kannski upp prjónana og sé hvort ég kemst eitthvað áfram með stóra stykkið mitt, en einhvern veginn efast ég um að sonurinn veiti mér mikið frí til þess.
Annars hef ég lítið prjónað eða saumað undanfarið... nema helst þennan fimleikabol hér sem Kamillan var merkilega ánægð með (aðallega út af "demöntunum" þó :))

Gleðileg jól til sjávar og sveita

2009-12-25T09:53:00.003Z

Við áttum yndislegan aðfangadag hér á Heiðmörkinni, gleðileg jól!

Skrifum undir

2009-12-15T08:40:00.003Z

Ég hvet ykkur kæru vinir til að styðja við bakið á SÁÁ í þeirri von um að ríkið muni minnka niðurskurðinn hjá þeim... það er svakalegt að ungir alkóhólistar muni ekki geta leitað endurhæfingar út af niðurskurði því þeir eru þeir einu sem kannski raunverulega eiga mestu batavonina.

Hlekkur á undirskriftalistann

Hlekkur á viðtal um þennan væntanlega niðurskurð í Íslandi í bítið

Skonsur - gamaldags og góðar

2009-11-13T09:42:00.003Z

Ég elska skonsur, og gríp frekar oft í þessar í hversdeginum.
Það er líka tilvalið að blanda þurrefnunum saman í poka og eiga til taks í sumarbústaðaferðinni, já eða jafnvel útilegunni?
Yndislegar með smjöri og osti.

Skonsur, uppskrift

2 bollar hveiti (eða fínt spelti)
1 bolli gróft spelti (eða heilhveiti)
1/2 bolli sykur
3 tsk lyftiduft
smá salt
1 egg
2 msk bragðlítil matarolía
mjólk

Byrjið á að blanda þurrefnunum saman, hrærið svo eggi olíu og mjólk saman við. Bætið mjólk út í þar til deigið verður viðráðanlegt en frekar þykkt.
Bakið á meðalheitri pönnu, snúið við þegar kantarnir eru farnir að þorna og loftbólur myndast.

Bananabrauð, bananananana....!

2009-09-25T20:09:00.001Z

Mmm ég elska bananabrauð... eintómt, með smjöri, með smjöri og osti... aftur á bak og áfram.
Gallinn er bara sá að fólkið mitt elskar banana, svo það er sama hversu marga ég kaupi - þeir klárast alltaf áður en þeir verða nógu þroskaðir fyrir brauðgerð! Lykilatriðið er nefnilega að hafa bananana nógu and**i þroskaða, því þá verður brauðið best. Helst þarf hýðið að vera orðið vel freknótt eða jafnvel brúnt.
Svo það er alveg bannað að henda þroskuðum banönum... munið það ;o)

Uppskrift:

1 egg
1 dl sykur
1 dl púðursykur
3 litlir bananar, vel þroskaðir
5 dl hveiti
1 tsk salt
1/2 tsk matarsódi

Stillið ofninná 180°C.
Stappið bananana vel saman
Þeytið egg og sykur vel
Blandið banönum saman við (afar varlega)
Blandið þurrefnum saman við (munið.. varlega, svo brauðið lyfti sér vel og verði létt í sér)
Setjið í smurt aflangt form og bakið í 40 mínútur.

p.s. til tilbreytingar er voða gott að setja smá súkkulaðispæni út í.

Kanilsnúðar

2009-09-22T20:59:00.003Z

Sendist með ástarkveðjum á Álftanesið!
Þessir eru beint úr eldhúsinu hennar mömmu og eru líklegast alltaf til taks í frystinum, yndislega mjúkir og góðir.

150 g smjörlíki
5 dl mjólk
12 g þurrger (1bréf)
1,5 dl sykur
1 tsk salt
850-900 g hveiti

brætt smjörlíki
kanilsykur

Smjörlíkið er brætt og mjólkinni svo bætt út í (blandan ætti að verða fingurvolg, þetta má ekki verða of gott).
Þurrefnum er á meðan blandað saman í skál.
Smjörlíki og mjólk er svo hellt út í og þetta hnoðað saman, deigið ætti ekki að loða við skálina.
Leyfið þessu að hefast á hlýjum stað í ca 40 til 60 mínútur.
Skiptið deiginu í nokkra hluta og fyrir hvern þeirra er deigið svo flatt út.
Bræddu smjörlíki (eða mjólk) er smurt á deigið, kanilsykri svo stráð yfir.
Leggið deigið saman, skerið í lengjur og snúið lengjunum saman.
Setjið í bréfform(muffins) eða beint á bökunarpappír.
Látið hefast í hálftíma áður en snúðarnir eru bakaðir við 200°C.

Kjúklingabásinn á Blómstrandi dögum

2009-09-18T07:00:00.000Z

Hér gefur að líta framtak Kamillu Lífar á Blómstrandi dögum 2009 : Kjúklingabás fyrir gesti og gangandi með þykjustu kjúklingi í skálum, vel merkt með teikningu af grilluðum kjúklingi framan á básnum!
Hún fékk þessa flugu í hausinn og fékk að framkvæma hana, ógurlega spennt og ánægð þegar ungir sem aldnir gengu framhjá. Spurning hvort það eigi að leyfa henni að yfirfæra þetta í eitthvað "meira alvöru" á næsta ári?

Konfekt hafrakúlur

2009-09-04T23:35:00.006Z

Namm.. þessar eru góðar. Og já, ég er crazy, það er föstudagskvöld og ég fór að föndra við nammigerð?
Stundum ræð ég ekki við mig, þessar eru líka yndislegar. Þær minna mig líka á gamlar og góðar stundir því það var ekki ósjaldan sem ég var við hlið mömmu að rúlla kúlum upp úr kókos :)
Þessi uppskrift á því fastan stað í uppskriftasafninu mínu, eins og svo margar aðrar sem ég hef sótt til mömmu.
Þær geymast vel í lokuðu íláti í ísskáp, en það er líka tilvalið að frysta þær og taka fram á góðum stundum.

Hafrakúlur - þessar gömlu góðu frá mömmu

125 g haframjöl
100 g púðursykur
2 msk kakó
2 msk sterkt kaffi
25 g brætt smjörlíki
1 tsk vanilla
kókosmjöl

Öllu nema kókosmjöli er hrært vel saman.
Kúlur mótaðar og þeim velt upp úr kókos.
Kælt.

Bon appetit!

Í vinnuna með mömmu

2009-09-02T06:00:00.000Z

Þrátt fyrir að Kamillu hlakkaði mikið til að byrja aftur í leikskólanum eftir sumarfrí þá var það henni svolítið erfitt og hún 5 ára gömul tók meira að segja upp á því að ríghalda í mig, grátbiðja mig um að fá að fara með mér og berjast um í fangi leikskólakennara þegar ég kvaddi.

Ég tók því þá ákvörðun að bjóða henni með mér einn dag í vinnuna.
Henni fannst þetta hrikalega spennandi... hún fékk penna og skrifblokk og sat svo og teiknaði heillengi á skrifborðinu við hlið mér, fékk safa úr safavélinni, var svo heppin að það var útlandanammi í boði, horfði svo á Tomma og Jenna. Það skemmtilegasta var samt að fá að skrifa á glervegginn ;)
Í hádeginu bauð ég henni svo á Ó Sushi sem var ekki síður spennandi.

Sumarlok

2009-08-30T10:48:00.004Z

Merkilegt að sumarið sé raunverulega fokið hjá, berjatíðinni nær lokið, skólarnir hafnir og fyrstu haustlitirnir farnir að sjást á runnum og trjám.
Stórmerkilegt hvað tíminn fýkur... ég er sannarlega þakklát fyrir þetta góða sumar.
Veðrið lék ekki bara við okkur heldur nýttum við okkur það vel, hvort sem það var með útilegu, bústaðaferð, sundlaugaferð, veiðitúr eða einfaldlega að njóta þess að vera í góðu núi.

Hér má sjá Tristan að HÁMA í sig rifsberin góðu. Eins og má sjá þá lærði að elska ber í sumar, hvernig sem þau voru að stærð, lit eða gerð.

Spotted!

2009-08-24T15:16:00.002Z

Anna Guðrún með sinn allra fyrsta kaffibolla!
Þetta teljast nú tíðindi :o)

Projectið góða

2009-08-19T10:18:00.003Z

Og verkefnið heldur áfram.. það er ekkert spaug að taka herbergi í gegn og þurfa að nota eina lausa tíma dagsins í það, þá erum við að tala um sirka eftir klukkan níu-tíu á kvöldin þegar börnin eru sofnuð og flest heimilisvinna frá. Úff!
Gluggarnir eru orðnir glansandi fínir og sönnun þess hvað málning getur gert mikið!
Kojan er komin í einingar og vonandi tekst mér í kvöld að koma helmningnum af kojunni saman í rúm fyrir Kamillu og svo bíðum við spennt eftir að fá "nýja" rúmið fyrir Gabríelu sem okkur áskotnaðist.

Frumskógarlífið var að endingu talið of dýrt ævintýri auk þess sem mynstrið á fílnum var ekki alveg að ganga í augun á okkur Víði. Að endingu ætlum við að fá fiðrilda stensla lánaða hjá Elísabetu frænku og gera eitthvað skemmtilegt með þeim.
Þeir eru voðalega fínir, hér er ein útfærsla:

Project systraherbergi(n)

2009-08-16T12:39:00.004Z

Loksins LOKSINS er komið að því að gera eitthvað fyrir systraherbergið og "geymsluna".
Ástandið var orðið þannig að við vorum alveg búin að missa tökin á skipulagi og tiltekt, varla hægt að stíga til gólfs og einfaldlega lokað þangað inn öllum stundum.
En ég er komin í blússandi gír og Kamilla fær að sofa á dýnu inni hjá okkur á meðan ég læt til mín taka í óreiðunni.

Verst að ég tók enga "fyrir" mynd.. en nú er allt dót komið afar óskipulega í svarta ruslapoka, fataskápar og hirslur búin að fá skipulagsmeðferðina og aukahlutir komnir í geymslu.
Og hver veit nema ég taki kojuna í sundur og leyfi Gabríelunni að fá prívasí? (Uss Sigga, ekki orð til heimasætunnar, það væri gaman að geta komið henni á óvart!)

En það er mikið eftir, ég er að byrja á að mála gluggana og er að gæla við þessa retro vegglímmiða á einn vegginn hjá Kamillu. Reyndar er ég hrifnust af gíröffunum en hún er algjör fílastelpa ;o)
Skoðið endilega design galleríið hjá wall-pops.com, þar sést dæmi um hvernig límmiðarnir líta út í herbergjum, stórir og flottir.

gómsætu berin!

2009-07-30T22:30:00.002Z

Mýrmann

2009-07-23T20:00:00.000Z

Þau Óli og Anna sem eiga og reka Kjöt & Kúnst í Hveragerði hafa greinilega einstaklega gott auga fyrir listrænum hæfileikum *blikk* því þau hafa boðið Víði að hafa hérumbil permanent málverkasýningu hjá þeim.
Þau hafa nýlega tekið staðinn í gegn og málverkin setja punktinn yfiri-ið.

Þið getið því gengið að því sem vísu að á veitingastaðnum sé að finna ca 10 Mýrmanns málverk sem öll eru til sölu, þetta er frábært fyrirkomulag því nú hefur Víðir nokkuð fastan stað til að beina áhugasömum á að skoða verkin sín.

Þú keyrir í kvöld elskan..

2009-07-19T23:38:00.000Z

Og kjellinn er kominn með bílpróf...
Finnst ykkur þá ekki að ég eigi inni sirka 10 ár þar sem ég get fengið mér í glas og hann keyrir?

Tristan Víðisson er eins árs í dag!

2009-07-17T08:00:00.003Z

Litli sjarmörinn er orðinn eins árs!

Af "hinu lífi" Kamillunnar

2009-07-15T20:00:00.000Z

Mér finnst stundum eins dvalartími Kamillu á leikskólanum sé "hitt lífið" hennar... þar á sér stað mikill þroski og lærdómur, leikur og átök. Og mest af því fer algjörlega framhjá okkur.
Fóstrurnar eru liðlegar ef við spyrjumst fyrir og Kamilla er jú farin að segja okkur frá ýmsu.. en yfirleitt hefur maður takmarkaða hugmynd um hvernig dagurinn hennar hefur verið.

Um daginn hvíslaði ein fóstran að Víði frekar skoplegri sögu um móment milli hennar og Kamillu.
Það var eitthvað á þá leið að hún tekur eftir því að Kamilla er vísvitandi að mylja matarkex á gólfið.
Hún bregst strax við og segir henni að þetta sé auðvitað ekki í lagi og að nú verði Kamilla að sækja sópinn og þrífa upp eftir sig! Kamilla tekur sér smá stund í að svara.. lítur síðan hægt upp, horfir með einlægni í augu hennar og segir "en ég er að ímynda mér að það séu mýs á gólfinu og það eru jól hjá þeim...".

Fyrsti "alvöru" ísinn...

2009-07-13T20:00:00.001Z

Uss.... honum fannst ísinn góður. Svo góður að í hvert skipti sem ég var að laga ísinn til, þá trylltist hann einfaldlega ;)

Fyrsta veiðiferðin

2009-07-11T20:00:00.000Z

Á veiðidegi fjölskyldunnar (28.júní sl) plötuðum við Kamilla hann pabba til að koma með okkur til Þingvalla. Kamilla hafði eignast stöng, tíbískt að það sé eina stöng fjölskyldunnar.. alltaf skulu börnin eignast allt haha. Pabbi kenndi mér á græjurnar og sýndi okkur rétta takta. Ég gerði góða tilraun til að þræða grey ormana á öngulinn EN *hrollur*... mér finnst þetta skelfilega erfitt.
Það fyndna var að ég var búin að lýsa því yfir við pabba hversu svakalega fína orma ég hafði týnt í matjurtagarðinum, hann skellti síðan bara upp úr þegar hann sá greyin, hann hélt því fram að þeir væru svo litlir að fiskarnir myndu bara ekki taka eftir þeim haha. En einn lítill beit á, svo agnarsmár að honum var sleppt, en Kamillu fannst dagurinn bestur og var þolinmóð miðað við allt og allt :)

Fleiri myndir á Flickr.

Gylltar strendur Vestfjarðanna

2009-07-09T20:00:00.000Z

Þessar myndir segja meira en nokkur orð um þessar dásamlegu strendur sem leynast á Vestfjörðunum.. og þessar voru sko ekki einu sinni þær fallegustu!
Smá sýnishorn... ég elska þessa tilfinningu að finnast ég vera komin á suðrænar slóðir bara við að horfa á þær og rifja upp hvernig var að róta með tánum í volgum sandinum... :)

Minjasöfn, staður fyrir börn?

2009-07-07T20:00:00.002Z

Á ferð okkar um Vestfirðina heimsóttum við Flugminja- og Minjasafnið á Hnjóti sem er staðsett á Örlygshöfn við sunnanverðan Patreksfjörð.
Ég viðurkenni eftir á að ég var ekkert æsispennt fyrir staðnum, sérstaklega þar sem við vorum með fimm börn 5 ára og yngri og ég ímyndaði mér að þau myndu sýna lítinn áhuga, en þessi staður var klárlega skylduheimsókn þar sem muni frá Önnu Guðrúnu langömmu okkar frá Stakkadal á Rauðasandi var að finna. Auk þess var okkur sagt að hann hafi verið frændi okkar sá sem kom þessu safni upp.

En börnin komu mér ánægjulega á óvart (nema Tristan auðvitað sem er allt of lítill fyrir slíkar heimsóknir). Þau voru einstaklega sérstaklega áhugasöm um stórt og smátt sem bar fyrir augu og gerðu heimsóknina svo miklu skemmtilegri, þau hlógu og gerðu grín, báru upp óborganlega stór augu þegar eitthvað kom þeim fyrir augu og hreinlega nutu heimsóknarinnar í botn!
Hér eftir er alveg á hreinu að við börnin munu ekki vera notuð sem afsökun til að heimsækja ekki minjasöfn, þvert á móti væru þau góð ástæða fyrir að sækja slíka staði heim.

Það er mjög margt skemmtilegt að sjá á Hnjóti. Sem dæmi þá er þetta eina flugminjasafnið á landinu... þar er að finna gamla rússneska vél sem hægt er að fara inn í, bandaríska hervél og ýmsar minjar tengdu flugi.
Sjóminjasafns-hlutinn er ótrúlega skemmtilegur og síðan er einn partur safnsins tileinkaður einyrkjanum Gísla á Uppsölum sem Ómar Ragnarsson gerði landþekktan hér um árið. Sá partur vakti hrifningu og furðu. Og það var sérstaklega skemmtilegt að hafa skoðað þessa muni því síðar í ferðinni fórum við og skoðuðum Uppsali sjálfa og sáum því ljóslifandi í hugskoti okkar hvernig munirnir hefðu hentað húsinu.

Myndina tók Anna systir af henni Kamillu Líf og lýsir vel hversu agndofa daman var á safninu :)

sleipa laugin

2009-07-05T11:00:00.002Z

Á Vestfjörðunum var samastaður okkar í litlu parhúsi á Tálknafirði, Tálknafjörður er um 290 manna sjávarpláss frekar miðsvæðis á sunnanverðum Vestfjarðakjálkanum. Við komumst að því að það er flott staðsett þar sem það er í passlegri fjarlægð frá mörgum athyglisverðum og skemmtilegum stöðum fyrir ferðalanga.

Í bænum var fín sundlaug sem við notuðum mjög mikið, hún var með rennibraut og alles. Nema hvað, að það var allt SLEIPT. Steyptar gangstéttarnar þurftu ekki einu sinni að vera blautar til að vera hálar, í barnapollinum var ekki hægt að standa með góðu móti og svo fram eftir götunum. Svo að vikunni liðinni vorum við líklegast öll búin að detta eða höfðum verið afar nær falli á einhverjum tímapunkti. En það var bara hún Milla litla sem varð fyrir skaða, - hún hrundi þegar hún hljóp upp stigann í rennibrautina og lenti þannig að tennur/tönn í neðri kjálka stakkst í gegnum hökuna. Já ekki vörina - heldur húðina þar fyrir neðan. Það blæddi auðvitað ógurlega, en hún stóð sig vel skottið. En þetta var hrikalega erfitt, það þurfti okkur bæði til að halda henni á meðan læknirinn vann sína vinnu og hún var hálf traumatæsuð eftir þetta greyjið.

Á leiðinni út heyrðist svo "en mamma, þú sagðir að læknirinn ætlaði bara að setja plástur!".
Já, lygarinn ég ;)

Og annar mánuður er hafinn...

2009-07-03T00:03:00.003Z

Það er nú meira hvað tíminn líður HRATT!!!
Ég hitti kæran vin í dag, hann Atli Þór sem vann lengi með okkur í bankanum leit við í dag og ég ætlaði varla að trúa því að þessi 2 námsár sem hann ætlaði að verja í Stokkhólmi væru virkilega liðin? Mér setur svolítinn ugg við þessari tilfinningu, því eftir því sem ég eldist finnst mér tíminn líða sífellt hraðar og ég vil ekki að tilfinningin magnist enn.. hvað segið þið mér eldri, munu árin fjúka hjá á ljóshraða bráðlega?

Og í takt við það finnst mér vera örfáir dagar síðan ég póstaði hér inn síðast, en viti menn það eru liðnar meira en tvær vikur!
En það hefur sko mikið gerst skal ég segja ykkur... við fjölskyldan lögðum land undir fót (eða land undir bíl og sjó undir bát) því við heimsóttum Vestfirði með stórum hluta af fjölskyldu minni. Þetta voru svo góðir og fallegir dagar sem við áttum þarna fyrir veztan og stórkostlegar ljósmyndirnar bíða þess að vera barnar augum ykkar.
Það urðu líka stórviðburðir þá viku. Gabríela Ósk eignaðist litla systur (og þurfti að bíða óþarflega lengi eftir að komast suður að smakka á henni ;) - enn og aftur til hamingju Sigga & Gulli! - og Kamilla Líf fékk í sig saumuð heil tvö spor.

Sumarfríið mitt hefst bráðlega fyrir alvöru og ég hlakka mikið til.. ekki annað hægt. Það verður ýmislegt brallað...

Hér er ein ljósmynd sem er mér kær, Víðir tók hana af mér og Tristani í fallegri fjöru á ferðalaginu. Fleiri myndir eru á leiðinni (af hverju vex mér þetta svona í augum að koma myndum á netið?)

Gleðilega þjóðhátíð!

2009-06-17T22:14:00.000Z

Endurbætt síða

2009-05-28T10:54:00.003Z

Við erum loksins búin að laga Mýrmanns síðuna aðeins til, nú sjást málverkin öll á einni síðu auk þess sem hægt er að smella á málverkin til að sjá stærri og svo enn stærri útgáfu af hverju málverki.

Endilega kíkið í heimsókn!
http://www.myrmann.com/

Gabríela 12 ára í dag!

2009-05-26T22:36:00.001Z

Til hamingju með daginn sætust!
(Takk Anna María fyrir þessa sætu gömlu mynd af henni ;)

Kókosbolla!

2009-05-20T00:37:00.000Z

Myndavélarbrosið

2009-05-13T00:32:00.004Z

Það uppgötvaðist í kvöld að hann Tristan er búinn að koma sér upp hinu skondnasta myndavélarbrosi... alveg með ólíkindum fyndið!
Hér eru sýnishorn - njótið!

Hin konungsbornu

2009-05-07T21:51:00.003Z

Kamilla Líf og Mirra frænka hennar duttu heldur betur í lukkupottinn þegar Þröstur afi þeirra fór með þær í húsdýragarðinn á þriðjudaginn - þær urðu vitni að því þegar fyrsta lamb ársins kom í heiminn!
Kamilla var furðu óhrædd við að vera vitni að þessum merkisviðburði skilst mér og lambadrottninguna fengu þær stöllur að skíra. Það átti nú að skíra gimbrina í höfuðið á stelpunum en það tóku þær ekki í mál og vildu fá að velja nöfnin sjálfar, Kamilla valdi nafnið Sara, og Mirra valdi "Ella". Þetta var bara eitt lamb svo hún hlaut nafnið "Sara Ella".
En ekki er sagan öll...

Sjáið fréttina með eigin augum á www.mu.is

Tómatfiskisúpa

2009-05-04T23:00:00.004Z

Á laugardaginn bauð ég fjölskyldunni upp á tómatfiskisúpu sem er í ægilegu uppáhaldi hjá mér. Bragðið er milt og gott og það er ekkert framandi við hráefnin (engar skeljar hér!).
En það besta við súpuna er að hún er svo svakalega holl.. þetta er nefnilega grænmetissúpa í felubúningi ;o)

Tómat fiskisúpa

1 laukur, saxaður
2-3 hvítlauksgeirar, saxaðir
olía, til steikingar
1 rauð paprika, skorin í bita
1 gul paprika, skorin í bita (eða nota aðra rauða)
3 gulrætur, skornar í bita
1 dós niðursoðnir tómatar
1 lárviðarlauf
Maldon salt
pipar
1/2 tsk karrí
1/2 tsk cayenne pipar
8 dl fiskisoð (eða vatn og fiskikraftur)
2 dl rjómi
fiskur að eigin vali og magni, etv 700 g
t.d. ýsa og rækjur, hörpudiskur og lúða, ...

Mýkið lauk og hvítlauk við rúman miðlungshita í olíu í súpupotti.
Bætið þá papriku og gulrótum út í og steikið áfram í nokkra stund.
Bætið tómötum út í ásamt lárviðarlaufi.
Kryddið með cayenne-pipar, karríi, salti og pipar eftir smekk.
Hellið svo soðinu yfir og látið malla í 30-40 mínútur.
Maukið allt í blandara eða með töfrasprota (verður mýkri í blandaranum).
Setjið súpuna aftur í pottinn og bætið rjómanum út í.
Smakkið til með salti og pipar.
Hitið að suðu.
Bætið fiskinum út í og sjóðið saman rétt í 1-2 mínútur. (Ef soðnar (bleikar) rækjur eru notaðar þá skuluð þið ekki sjóða þær, heldur bara skella þeim út í rétt áður súpan er borin fram.
Berið strax fram, etv með góðu brauði.

Ath:
Sniðugt að elda súpuna daginn áður, bæta fiskinum svo bara út í þegar hún er hituð upp.
Auðvitað má líka hægt að bera súpuna fram án þess að mauka hana ;-)
Ef ég vil ekki mikið fiskibragð af súpunni, þá helminga ég fiskikraftinn og set grænmetiskraft á móti.

Skeljasúpa

2009-05-03T12:18:00.005Z

Fyrsta sjávarréttasúpan sem ég man eftir að hafa bragðað var haustið '99 í Sevilla á Spáni. Ég þurfti alveg að taka á honum stóra mínum til að þora að bragða þessa súpu, því það sem ég bjóst við að yrði appelsínugul rjómalöguð súpa með ýsu, kom í ljós að var appelsínu-glær súpa full af allskonar skeljum sem ég síðar lærði að var meðal annars kræklingur. Ég kom þessu niður en bara rétt svo, því mér fannst ekki nógu sannfærandi að borða skeljakjöt á þeim tíma... eitthvað sem mér finnst afar exótískt og spennandi í dag.
Haha það hefur örugglega verið hrikalega fyndið að horfa á mig reyna að borða þetta, ég hafði ekki hugmynd um hvernig átti að fara að þessu, og var alveg skelfilega skeptísk!

En enn í dag er ég hissa á skeljaúrvalinu í súpunni, það er nokkuð ljóst að það er ekki hægt að fá þetta úrval hér heima.

En ég er rosalega spennt fyrir kræklingum og er búin að eiga mér þann draum í mörg ár að tína kræklinga. Meira að segja bíður mín loforð eiginmannsins að fara með mér í slíka tínslu í sumar... spennó.. Hann á sér nefnilega draum um einhverskonar hvítvíns-smjörs-skeljasoð borið fram með frönskum og aioli.

Ég get samt ekki sagt að kræklingar séu það besta sem ég veit.. (mér finnst þeir bragðast mest eins og salt hehe), en ég ætla mér að elska þetta fyrirbæri.. !

Hafið þið tínt kræklinga?

Afmælisgjöfin

2009-04-28T07:00:00.003Z

Afmælisgjöfin sem ég fékk á dögunum þegar ég varð þrítug er bara ein af bestu gjöfum sem ég hef fengið! Þessi forláta saumavél.
Ég er svooo ánægð með að allir skulu hafa slegið saman í að gefa mér þessa vél, virkilega vel til fundið! Enn og aftur - TAKK TAKK TAKK TAKK TAKK!

Jú það er komið sumar..

2009-04-26T22:02:00.004Z

Kamilla með Ingibjörgu vinkonu sinni 25.apríl 2009

Þegar börnin eru farin að klifra í trjánum þá er komið sumar!
Þrátt fyrir allar úlpur! Því úlpur fá aldrei að fara algjörlega í felur á ísalandinu góða :)

Gulur dagur

2009-04-24T17:19:00.003Z

Það var "GULUR DAGUR" í Kamillu-leikskóla í dag, sem er nú ekki í frásögur færandi nema fyrir þær sakir að barnið átti ekki eina gula flík.
En það vildi svo til að móðirin átti gult efni og skveraði í einn glaðlegan og gulan sumarbol!
Ég er nokkuð ánægð með þetta þrátt fyrir teygt hálsmál, þó ég eigi engan heiður af hönnuninni sem er úr saumablaði Ottobre. En við skulum ekkert vera að tala um hversu margir klukkutímar fóru í verkefnið...

Fermingardagurinn í gær

2009-04-20T11:38:00.004Z

Elsku Sól var fermd í gær. Til hamingju með daginn!
Mikið var hún falleg og það lögðu margar hendur á sig óendanlega vinnu við að gera daginn hennar eins fullkominn og mögulegt var. Útkoman var virkilega góð og það hefði mátt halda að þetta hafi verið brúðkaupsdagurinn hennar, svo fínt og fallegt var þetta, og með glæsiveitingum að hætti Önnu Maríu. Og svo söng hún fyrir okkur eins og engill. Ég verð að segja að það er sérstaklega skemmtilegt að vera í fermingarveislu þar sem fermingarbarnið býður gesti velkomna og að hún skuli hafa sjálfstraustið í lagi til að syngja tvö lög fyrir gestina er bara alveg dásamlegt!
Myndavélin var fjarri góðu gamni, ég vildi óska að ég gæti sett inn mynd af fermingarstúlkunni en til að fyrirbyggja allan misskilning þá er myndin auðvitað af henni Gabríelu Ósk.

Tristan & Kamilla voru svo ljúf og góð í kirkjunni að þau fengu sérstakt hrós frá prestinum.
Það var dásamlegt að sitja við hlið Kamillu, hún var spennt og skynjaði hátíðarandann. Sálmabókinni var flett og það var sungið með sálmunum. Stúlkurnar á bekknum fyrir framan fylgdust meira með dóttur minni heldur en með athöfninni, svo gaman var að fylgjast með tilraunum hennar til að elta sálmana með björtu og skæru röddinni sinni.
Undir lokin varð hún þó örlítið þreytt en þá dró móðirin upp bók og penna fyrir hana, og þá fór hún að teikna það sem hún sá fyrir framan sig.. gesti á stólum, prest, ljósahaf og altari. Fallegt.
Ég sá hana síðan varla í veislunni, svo upptekin var hún með nýju vinkonu sinni henni Katrínu Ósk sem er þriggja ára afar skýr stúlka. Tristan var góður og ljúfur í veislunni og kjammsaði á kalkún.
Og hún Gabríela Ósk! Sjáið þessa mynd af henni (stolin frá henni Siggu Dóru). Ellefu ára - að verða tólf, og lítur út eins og fermingarstúlka! Guðdómlega falleg og dömuleg.
Hún var algjör gullmoli í veislunni, og það var gaman að fylgjast með henni á fallegu grænu hælaskónum sínum, já, það er erfitt að venjast hælum! Ég segi nú ekki að hún hafi skakklappast, en hún var dömulegri þegar hún stóð kyrr ;) Dúlla.

Litlu partýkjötbollurnar!

2009-04-06T17:39:00.014Z

Ég skil ekkert í því að ég skuli ekki vera búin að skrásetja þessar brillíant kjötbollur hér fyrr!
Þær eru voðalega bragðgóðar, líka einfaldar, og sóma sér ógurlega vel á borði, hvort sem það er kvöldmáltíð á virkum degi með hrísgrjónum og salati eða sem pinnamatur á smáréttaborði veislunnar.

Ég er sérstaklega hrifin af þeim sem veislukosti því þær má elda með góðum fyrirvara, skella í frystinn og þurfa síðan bara upphitun í 10 mínútur í bakaraofni áður en þær eru bornar fram.
Þetta er uppáhald hér á bæ!

Kjöttegundin er að eigin vali, mér þykir gott að hafa hvort sem er svínahakk eða nautahakk.. ég er ekki frá því að mér finnist best að hafa það blöndu af þessu tvennu.

500 g kjöthakk
1 dl mjólk eða 1-2 egg
1 pakki Ritz kex
1 pakki Púrrulaukssúpa frá Toro

Ritz-kexið er mulið smátt, og síðan er öllu hrært saman þar til úr verður þykkt fars. (Hér er maður þakklátur fyrir Kitchen Aid!)
Litlar bollur mótaðar úr deiginu. Stærðin fer eftir smekk - teskeiðarstærð fyrir partýið en maður nennir kannski ekki handavinnunni fyrir hversdaginn ;o)
Þeim er svo raðað á bökunarpappírsklædda ofnplötu og bakaðar við 190°C (eða 170°C m.blæstri) þar til þær eru orðnar brúnar og stökkar sem er ca 10-15 mínútur fyrir þessar minnstu.
Bornar fram í súrsætri sósu.

Sósan, eftirfarandi brætt saman í potti:
- 1 dl rifsberjahlaup, 1 dl tómatsósa, 1 tsk chili krydd
eða
- 1 dl rifsberjahlaup, 1 dl chili tómatsósa frá Hunts

Lausfrysting (e.flash freezing)

2009-04-02T07:00:00.001Z

Ég hef að minnsta kosti 2svar sinnum áður fjallað hér á blogginu um snilli þess að lausfrysta hluti.
Og ég fer ekki ofan af því að þetta er ein mesta uppgötvun mín í eldhúsinu undanfarin misseri!

Súkkulaðisykurkökurnar er fullkomið dæmi um kökudeig sem má lausfrysta.

Þá leggur maður smjörpappír á fat, útbýr kökurnar eins og þær væru að fara í ofninn (rúlla, hnoða, skera, kremja) en leggur þær í staðinn á fatið og frystir svo. Passa auðvitað að þær snerti ekki hverja aðra á fatinu, því við viljum ekki að þær frystist fastar saman.
Þegar þær eru síðan orðnar frosnar þá pakkar maður þær í hentugri loftþéttar umbúðir sem passa betur í frystihólfið.
Þar bíða þær svo þeirrar stundar að löngunin geri vart við sig hjá eigandanum eða góða gesti ber að garði, því þá eru þær teknar upp, þeim raðað á bökunarplötu og bakaðar í ögn lengri tíma heldur en uppskriftin gerði ráð fyrir, því þær eru jú frosnar. Eða látið þiðna áður en þið setjið í ofninn.

Tilvalið að eiga slíkar gersemar í frystinum :)

Þetta er líka sniðug lausn þegar verið er að undirbúa veislur, því það tekur enga fyrirhöfn að skella kökunum í ofninn þegar þær bíða bara tilbúnar í frystinum!

Annað sem ég hef talað um að ég lausfrysti eru sítrónusneiðarnar að sjálfsögðu.
Það geri ég alveg eins... eða sker sítrónuna í tvennt eftir endilöngu, og sneiði hvern helming í þunnar sneiðar. Sneiðarnar fer ég svo með alveg eins og kökurnar, lausfrysti og pakka.
Þeim skelli ég svo beint út í te, gos eða vatnsglas eftir því sem við á.

Kamilla Líf 5 ára!

2009-03-30T22:05:00.006Z

Jæja, þá er komið að því að snúllan verði 5 ára.
Mikið þykir mér hún orðin stór!

Áhugavert

2009-03-29T07:00:00.002Z

Áhugaverðar þessar pælingar hjá henni Siggu Dóru, vekur mann til umhugsunar.
Það er áhyggjuefni ef við erum í góðri trú að ala börnin okkar upp þannig að þau geri ekki handtak nema fá einhvers konar verðlaun... gera ekkert fyrir ekkert eins og hún orðaði það.

Erum við ekki stundum að fylgja uppeldis aðferðum sem eru heitar eða viðteknar án þess að líta þær nógu gagnrýnum augum?
Ég get alveg viðurkennt að ég hef gert ýmislegt samkvæmt bókinni án þess að endilega reyna að sjá hvaða neikvæðu afleiðingar það gæti haft í för með sér. Einfaldlega af því að höfundur er virtur, aðferðin mælist vel fyrir og þess háttar.

Pom Poms

2009-03-27T07:00:00.002Z

Það verður að viðurkennast að svona Pom-Poms er ansi sætt skraut?
Maður getur meira að segja gert það sjálfur

Súkkulaðismákökur

2009-03-25T07:00:00.010Z

Hún Deb sem bloggar á Smitten Kitchen er algjör súkkulaðifíkill – og þá sérstaklega á *ákveðnum* tíma mánaðarins ;) Ég er áskrifandi að blogginu hennar og fæ því reglulega girnilegar uppskriftir beint í æð... hún er frekar fyndin, bloggar bæði um vel heppnaða matreiðslu og misheppnaða, deilir uppáhalds uppskriftum, en eignast fljótt ný uppáhöld.

Um daginn prófaði ég í fyrsta sinn að elda eina af uppskriftum hennar... og niðurstaðan? Eftir að troða í sig hálfri bökunarplötu af smákökunum með mjólk leit Víðir loks upp og sagði „Dóra, ertu að reyna að fita mig með bakaraofninum?, NAMM!“

Og ég tek undir það... NAMMINAMM!! Þetta er líka fullkomin „það-er-ekkert-til-í-skápunum“ bakstur, því innihaldið er svo venjulegt að hráefnin ættu alltaf að vera til á heimilum sem á annað borð baka einhvern tímann. Og kannski frekar ódýr bakstur, þar sem það er engin krafa um fínheita súkkulaðistykki eða slíkt.

OG, svo er þetta tilvalið dæmi um deig sem má lausfrysta. Þá bíða óbakaðar smákökurnar flatar í frystinum þar til manni dettur til hugar að skella þeim í ofninn og njóta nýbakaðra smákaka með engri fyrirhöfn ;)

Hér er uppskriftin yfirfærð á íslensku, upprunalega uppskriftin hennar Deb er hér.
Ég mæli með því að þetta sé gert í matvinnsluvél/hrærivél því deigið er ógurlega þykkt.

Súkkulaðisykurkökur

ath. mælieiningin bolli: 1 bolli = 250 ml

1 1/4 bolli hveiti
1/2 bolli ósætað kakó
1 tsk matarsódi
1/4 tsk lyftiduft
1/4 tsk salt
1 1/2 bolli sykur
1/2 bolli + 2 msk ósaltað smjör, við herbergishita (mikilvægt)
1 stórt egg

Setjið bökunarplötur í ofninn, hitið í 190 °C.
Í hrærivél/matvinnsluvél skulið þið blanda saman hveiti, kakó, matarsóda, lyftidufti, salti og sykri.
Með vélina á lágum styrk skuluð þið bæta smjörinu við og svo egginu.
Blandið þar til deigið kemur saman í góðum og þéttum massa.
Takið teskeiðar af deigi og setjið á bökunarpappír. Klessið deigið niður (því það lekur ekki mikið út), því þynnri sem þið viljið þær, þeim mun flatari skulið þið klessa þær.
Bakið í 9 mínútur á heitum bökunarplötunum og látið kólna á vírgrindum áður en þið takið kökurnar af pappírnum.

Þrítug í dag!

2009-03-23T07:00:00.001Z

Það er skrítið að segja þetta upphátt: "ég er þrítug".
En ó vell, ég er orðin þrítug! Húrra, ég lengi lifi...
Megi þau næstu 30 verða jafn dásamleg og þau síðustu!

Becky Kelso

2009-03-20T07:00:00.000Z

Nú er ég kolfallin.... undur fagrir gamaldags skartgripir.
Ég hef nú ekki heyrt um Becky Kelso áður en hún hlýtur að vera búin að slá í gegn, því það er geggjað að vafra um síðuna hennar og láta sig dreyma um að eignast einn slíkan grip.
Það eru fleiri steinar í boði og allir eru þeir svona fagrir... en þetta er sko ekki gefins!
Kannski finn ég ódýra repliku einhversstaðar ;)

Hirðingjabaka (shepherd's pie)

2009-03-18T07:00:00.005Z

Hirðingjabaka, öðru nafni "Shepherd's pie" er eitthvað sem mig hefur alltaf langað til að smakka.. jú að vísu er þetta matur að breskum sið, sem maður er ekkert alltaf sannfærður um að bragðist vel, en ég var viss um að þetta væri eitthvað sem mér líkaði svo ég ákvað að prófa.
Og jú, þetta er afbragðs góður hversdagsmatur sem verður örugglega reyndur aftur við tækifæri.
Hakk og kartöflumús í sparifötunum ;)

5 stórar kartöflur, afhýddar og skornar í teninga
1-2 msk smjör
1 - 2 msk laukur, mjög fínt saxaður
1-2 msk sýrður rjómi (má sleppa)
1/2 dl rifinn ostur
salt og pipar
5 gulrætur, saxaðar
1 dl frosnar grænar baunir (peas) (má sleppa)
1 msk matarolía
1 laukur, saxaður
1 hvítlauksrif, smátt saxað
500 g fitulítið nautahakk
2 msk hveiti
2 msk tómatsósa
1 tsk Worchestershire sósa
200 ml nautasoð
1/2 dl rifinn ostur (til viðbótar)

Sjóðið kartöflurnar í söltuðu vatni í ca 15 mínútur eða þar til þær eru tilbúnar. Hellið vatninu af og stappið þær. Blandið smjörinu, 1-2 msk lauk, sýrða rjómanum og 1/2 dl af osti saman við kartöflurnar. Kryddið með salti og pipar að vild og geymið blönduna til hliðar. Sýrði rjóminn er ekki nauðsynlegur en gerir blönduna léttari og það er auðveldara að dreifa úr henni.
Sjóðið gulræturnar þar til þær eru tilbúnar en samt stinnar, ca 15 mínútur. Sjóðið baunirnar með síðustu mínúturnar. Hellið vatninu af og geymið.
Hitið ofninn í 190°C.
Hitið olíu í stórri steikarpönnu. Steikið lauk og hvítlauk við meðalhita þar til hann verður glær en ekki brúnaður. Bætið hakkinu út á pönnuna og steikið þar til það er orðið vel brúnað. Látið fituna leka af, blandið hveitinu út í og steikið í 1 mínútur. Bætið nautasoði, tómatsósu og Worchester sósu út á. Sjóðið í 5 mínútur.
Dreifið kjötinu í botninn á eldföstu móti, dreifið kartöflum og baunum ofan á. Toppið með lagi af kartöflumúsinni og dreifið 1/2 dl af rifnum osti yfir.
Bakið í forhituðum ofninun í 20 mínútur eða þar til gullinbrúnt.

Ljúft líf

2009-03-16T07:00:00.000Z

Ljúft líf, originally uploaded by Dóra & Víðir.

Það er yndislegast í heimi að vera mamma...

Ævintýraspegill í stelpuherbergi

2009-03-14T07:00:00.002Z

Ævintýralega fallegur spegillinn...
Mikið vildi ég að Kamilla ætti ævintýraherbergi með slíkum spegli. Ég er þó ekki viss um bleika litinn, hann mætti alveg vera öðruvísi á litinn. En ef Kamillan fengi að velja þá yrði hann bleikur!
Fæst í Habitat.

Hverjum þykir sinn fugl fagur

2009-03-12T07:00:00.000Z

Máltakið "hverjum þykir sinn fugl fagur" er hverju orði sannara.
Það eru til dæmis engin börn fegurri en manns eigin, lítið til dæmis á þennan, móðuraugað bara bráðnar...
:)

Friðveig Dögg 5 ára

2009-03-11T07:00:00.002Z

Til hamingju með 5 ára afmælið Friðveig dúlla!
Og takk fyrir afmælisveisluna síðasta sunnudag, við skemmtum okkur sko vel!

Dóra designer

2009-03-10T07:00:00.000Z

Það var ekki lítið sem ég var STOLT af sjálfri mér þegar ég sá að það sem ég var búin að vera að klippa og sauma úr gömlu efni sem ég fann inni í skáp, endaði raunverulega sem nothæf tuðra!
(ath. það eru bönd á töskunni, á efri myndinni faldi ég þau bara ofan í henni)

Fræ tannálfsins farin að spíra

2009-03-08T09:58:00.003Z

Tvær tönnslur eru farnar að spíra í neðri góm hjá gaurnum okkar!
Gaman gaman, en þá þarf mjólkandi móðirin kannski að vara sig?

Tannálfurinn getur þá sótt uppskeruna eftir sirka 6 ár ;)

Hártoganir

2009-03-06T21:29:00.002Z

Hártoganir, originally uploaded by Dóra & Víðir.

Og hann notar hvert tækifæri!
Sem betur fer er hún afar umburðarlynd...

Kelnar kanínur

2009-03-01T10:45:00.003Z

Kamilla fór með mig í bíltúr um daginn.
Förinni var heitið í Ölfusborgir (sumarbústaðir hér við hlið Hveragerðis), til að kynna mig fyrir kanínunum sem þar búa.
Sjáið hvað þær eru gæfar og skemmtilegar!
Þarna búa þær villtar í kringum sumarhúsin, og eru svo gæfar að það er hægt að láta þær borða úr lófa sér. Það er enginn vandi að finna þær, það er kröggt af þeim, og þær gætu alveg átt það til að koma hlaupandi á móti ykkur í von um smá brauðbita :)

Ég mæli með því að kíkið þangað með börnin ykkar við tækifæri, ef þið eigið engin börn þá getið þið efalaust fengið þau lánuð! Ekki gleyma að taka andabrauð með ;)

Jarðaberja cupcake(múffa)!

2009-02-27T09:38:00.003Z

Þessa dagana er ég í baksturspakkanum... baka daginn út og daginn inn... alltaf eitthvað gómsætt á boðstólum - drífið ykkur í heimsókn, annars gætuð þið misst af þessu! Því það kemur að því að ég dett í 1-2 mánaða baksturslægð ;)

Þessar voru á boðstólum á miðvikudaginn, eftir forskrift frú Mörthu Stewart. Uppskriftin er hér (strawberry cupcakes), en hvað nafn hefur maður fyrir "cupcakes" á íslensku?
Ekki veit ég, en góðar og sykursætar eru þær.
Og fallegar svona bleikar, ég hugsa bara að þetta krem verði notað sem krem á afmælisköku Kamillunnar í ár!

Ríkasti maðurinn í Babylon

2009-02-26T11:29:00.001Z

Það var fyrir um það bil 2 árum síðan sem ég keypti mér þessa bók.

Eftir lestur hennar ákvað ég að ég myndi gefa öllum sem ég þekki þessa bók. Svo góð fannst mér hún.
Og ég stend við það að þessa bók eigi ég eftir að panta í tugatali frá Amazon og gefa sem gjöf og um leið heita ósk um að viðtakandi tileinki sér það sem bókin býður.

Ég vildi óska að ég hefði dottið fyrr niður á þessa bók eða aðra svipaða.. helst strax á menntaskólaárunum, eða fyrr, því það er mikilvægt að temja sér rétta umgengni við peninga um leið og maður fer að afla þeirra.

Ég er viss um að ef ég hefði þekkt og virt þessi fræði, þá væru fjármál okkar allt önnur í dag! Það er ekki spurning.

Það er skrítið að "peningafræði" séu ekki inni í almennri námsskrá. Því þegar á botninn er hvolft er flest sem snertir daglegt líf sett í kennsluform: tungumál, matreiðsla, hreyfing, o.s.frv.

Af hverju skyldi okkur ekki líka vera kennt að hugsa um peningana okkar?

Málað blúndu gólf

2009-02-24T21:44:00.000Z

Þetta æðislega gólf er í herbergi afar heppinnar 7 ára gamallar stúlku... *öfund*, þetta var gert af sama hönnuði og veggurinn.

Málaður Art Deco veggur

2009-02-22T21:14:00.000Z

Vá...

Sjáið hér hvernig þetta var gert.

Kardimommubærinn!

2009-02-20T11:06:00.001Z

Dagný vinkona var svo yndisleg að bjóða okkur Kamillu með sér og Helgu Sigríði að sjá Kardimommubæinn forsýndan í Þjóðleikhúsinu í kvöld!
Við erum fullar tilhlökkunar, þetta verður æðislegt :)

-> síðar: sýningin var stórskemmtilegt augnayndi sem við eigum örugglega eftir að heimsækja aftur síðar!

Að frysta sítrónusneiðar...

2009-02-19T10:11:00.002Z

Thanksgiving 2008 - Lemon Slice - 026 - 300, originally uploaded by Paul-W.

Sítrónur; ilmandi litsterkur sítrus sem er frábær út í drykki og matseld.
Gallinn er bara sá að maður þarf kannski bara eina og eina sneið og þegar uppi er staðið liggja þær fyrir skemmdum í kælinum.

Frábært ráð sem ég nota stundum hér heima er að kaupa fallegar sítrónur þegar þær fást.
Skera þær niður í sneiðar, lausfrysta á bökunarpappír og pakka svo í frystipoka. (Með því að lausfrysta fyrst þá frjósa sneiðarnar ekki saman).
- Svo grípurðu bara eina og eina sneið og skellir út í drykkinn. Fullkomið!!!

Þetta er nú eiginlega sparnaðarráð líka ;)

Atvinna: bloggari ?

2009-02-17T10:04:00.001Z

Einhvern veginn fór það alveg framhjá mér að í heimi hér væru raunverulega fullt af fólki sem hefur það fyrir atvinnu að blogga. Vissu þetta kannski allir ?
Trixið er þá að vera með nógu marga lesendur til að geta selt auglýsingar á blogginu sínu.
Actually svoldið sniðugt, húrra fyrir þeim sem byrjaði á þessu!
Ég hef svolítið verið að vafra um bloggheima undanfarið, og það eru greinilega yfrin öll af góðum bloggurum sem vinna fyrir sér á þennan hátt, þ.m.t. stay-at-home-moms/dads sem hafa fundið sig í þessum bissness.
Að auki eru haldnar reglulegar blogg-ráðstefnur! Ja hérna hér, og ég sem hélt að blogg væri bara blogg....

Nokkrir:
dooce
simplemom
More Ways To Waste Time

Krúttspútt sundgarpur

2009-02-15T20:18:00.003Z

Krúttspútt sundgarpur, originally uploaded by Dóra & Víðir.

Já, hann er að læra að synda!
Það gengur ljómandi vel - hann eeeeeeelskar sund ;)
Þið megið því búast við að mæta okkur á barnvænum sundstöðum..!

Fallegt

2009-01-30T10:19:00.003Z

Það væri gaman að skarta þessu.
Þetta er eitt af fjársjóðunum sem má finna á Etsy, vefverslun sem þar sem fólk getur selt hönnun sína.

Ég elska Google Reader!

2009-01-29T09:55:00.002Z

Kannist þið kannski við orðin "RSS", "ATOM" eða "subscribe" á bloggsíðum?
En ég er nokkuð viss um að meirihluti ykkar hefur ekki ljósa hugmynd um hvað þetta þýðir :)

Tökum mig sem dæmi. Hér fyrir um 2 árum voru töluvert margar bloggsíður sem ég fylgdist með. Ég tók öðruhverju "rúntinn" og tékkaði á hvort það var komið nýtt blogg.
Sumir bloggarar duttu síðan öðruhverju í dvala (*hóst*) og það leið langt á milli blogganna og ég fór að fylgjast verr með. Og í dag bara hreinlega á ég erfitt með að muna linkinn á síðurnar og hef svo oft tínt favorites listanum mínum með tíðum tölvuskiptum.

En Google Reader hefur komið mér til bjargar!
Þar skrái ég inn allar síðurnar sem ég vil fylgjast með.
Og þegar ég vil athuga hvort bloggvinir mínir hafi verið að tjá sig, þá þarf ég bara að opna eina vefsíðu, http://www.google.com/reader. Þar sé ég í snatri hvort komnar séu inn nýjar bloggfærslur og ég les þær á staðnum!

Bjútífúl... þarf ekki að muna hvar vefsíðurnar eru... þarf ekki að fara inn á þær allar bara til að komast að því að þar er ekkert nýtt að sjá!

Þar eru líka skemmtilegir fítusar.... til dæmis hægt að stjörnumerkja stakar bloggfærslur sem maður vill etv geyma og skoða síðar.

Gleðileg jól!

2008-12-18T11:01:00.004Z

Litli teiknarinn kennir mömmunni lexíu!

2008-11-28T13:03:00.004Z

Ó guð, hvað ég er þakklát fyrir þessi yndislegu börn!
Kamilla sýndi mér í gær á einfaldan en áhrifaríkan hátt að ég var ekki alveg að standa mig.

Við áttum góða stund saman í eldhúsinu að baka kókostoppa og enduðum á að baða þá í bræddu súkkulaði. Henni fannst þetta auðvitað alveg frábært (á milli þess sem hún sleikti súkkulaðið af fingrunum). Ég skellti síðan í aðra smákökusort ásamt einu pizzadeigi & sósu, og fór síðan eitthvað fram að sinna bróður hennar og hún hélt áfram að dunda sér í eldhúsinu... hún kom svo fram og bað mig um að hjálpa sér að gera sósu. Sósu? Ég hélt nú ekki að hún ætti ekki að vera að sulla neitt núna (hún á það til að blanda ýmsu hráefni saman og bera á borð fyrir okkur "dýrindis" matseld). Hún skottaðist aftur inn í eldhús og kom stuttu síðar fram með smáköku sem hún hafði smurt með pizzasósu og bauð mér að gjöra svo vel!

Ég hefði átt að þakka fyrir þessa dýrindis köku sem hún hafði smurt svona fallega, en ég var ekki alveg að hugsa... fannst hún vera að þvælast fyrir að sullast í einhverju sem hún átti að láta í friði (og hafði áhyggjur af að restin af smákökunum væru líka baðaðar í pizzasósu!) svo án þess að hugsa mig um var ég svolítið höst við hana, og bað hana um að láta þetta í friði, pizzasósan væri fyrir pizzuna en ekki smákökurnar!

Án þess að segja orð, gekk daman inn í herbergi og kom fram með blað og tússpenna, settist á gólfið fyrir framan eldhúsið og fór að teikna. Ég fylgdist með henni í laumi þar sem hún sat tautandi á gólfinu, að endingu stóð hún upp og færði mér myndina.
Sjáðu mamma, þarna er ég að setja sósu á smákökurnar, og þú ert mjög reið!
Þetta kallar maður að kenna mömmu sinni lexíu!

Litli teiknarinn

2008-11-19T13:10:00.001Z

Hún Kamilla Líf dundar sér vel við að teikna. Helsta áhugamálið (dýrin) verður auðvitað oftast fyrir valinu og við hvetjum hana til dáða.
Þessa dagana er hún samt farin að krota á hvaða pappír sem hún sér, og engu er eigrað! Eins og sést á þessari mynd þá varð þarna bankapóstur fyrir barðinu á teiknaranum, og það er ekki langt síðan ég rétt náði að bjarga gjafabréfi undan pennanum!
Það borgar sig því að geyma mikilvæg skjöl á góðum stað, órafjarri...

Ég man svo skýrt eftir því að hafa verið lítil hnáta og farið með mömmu í bankann. Þetta var á tímum pappírs og fólk þurfti að skrifa millifærslur og greiðslur upp á þar til gerð eyðublöð sem var síðan afhent gjaldkeranum. Munið þið eftir þessu? Ekki svo langt síðan, en samt.

Allavegana, mér fannst ÆÐISLEGT að fara með þeim í bankann því þá fékk ég að setjast við borð til þess gerð að fylla út greiðslufyrirmælin og ég fyllti út eyðublöðin hvert á fætur öðru, með flæðandi fagurri fullorðinsskrift.

Eða það fannst mér, þetta voru auðvitað bara línur af bogadregnum strikum :)

Núna sé ég þetta sama í dóttur minni. Hún hefur því miður ekki skemmtileg eyðublöð í virðulegum bankabyggingum til að fylla út, en hún finnur sér bréf sem hún skrifar hverja línuna á fætur annarri með virðulegri fullorðinsskrift.

Grjónagrautur & grautarlummur

2008-11-15T18:22:00.005Z

Grautarlummur eru ótrúlega ömmulegt fyrirbæri.
En grjónagrautur og lummur úr afgangnum eru frábært ráð til að spara í matarútgjöldum!
Og... þetta er bara svo gott!

Það er nauðsynlegt að vera með ódýran mat inn á milli og þar kemur grjónagrauturinn sterkur inn, ódýr en góður, og sívinsæll hjá ungviðinu.

Þessi uppskrift af grautarlummum er mjög fín. Það er hægt að bæta sykri í deigið, en ég kýs að sleppa því vegna þess að þá er hægt að nota fjölbreyttara álegg!
Prófið til dæmis að smakka þær með

smjöri & osti
rjómaosti & reiktum silungi
kavíar
sykri
sultu
túnfisksalat
nota hugmyndaflugið...

Grautarlummur:

200 g grjónagrautur (ca)
50 g hveiti
1 tsk lyftiduft
1 tsk salt
1 egg
1/2 dl mjólk
2-3 msk matarolía

Sigtið saman hveiti, lyftiduft og salt. Hrærið restinni saman við hveitiblönduna. Ef blandan er allt of þykk þá er gott ráð að þynna með mjólk, en athugið að deigið á að vera vel þykkt - amk jafn þykkt og vöffludeig.
Bakið lummurnar á báðum hliðum á frekar heitri pönnukökupönnu, 3-4 í einu á pönnunni. Það má snúa þeim við þegar kantarnir eru orðnir þurrir og loftbólur eru í yfirborði þeirra.

Namm!

Takk Ásthildur!

2008-11-14T09:07:00.003Z

Eitt af því sem er ÓTRÚLEGA spennandi fyrir krakka eins og Kamillu, er að fá sendingu í pósti!

Og í vikunni sendi Ásthildur henni þessar dýrmætu froskalappir, sem hún hafði saumað handa henni!

Það var ekki lítil gleðin þegar hún sá hvert innihaldið var! Og hugulsemin í Ásthildi er engri lík - þúsund þakkir :)

Maður reynir auðvitað að innræta barninu sínu þakklæti í garð annarra og þegar litli froskurinn var kominn í ró þá ræddum við sendinguna aðeins. Við ræddum um af hverju Ástí var svona góð að sauma handa henni froskalappir. Það væru örugglega margar ástæður, til dæmis að Ástí hafi kannski séð hvað Kamillu þættu froskaullarsokkarnir hans Tristans skemmtilegir og viljað þá líka gefa Kamillu froskalappir, og eins að líklegast elskaði hún Kamillu og langaði til að gleðja hana (K:"elskar hún mig?" með gleðisvip), og að kannski væri hún glöð yfir hve Kamilla var góð og skemmtileg við Elíönu litlu um daginn (K:"en ég er ekki alltaf góð við hana, stundum tek ég af henni dótið" háalvarleg á svip).

Yndislegt :o)

Sparnaðarráð

2008-11-12T14:39:00.001Z

Mér (eins og kannski flestum öðrum?) er sparnaður ofarlega í huga þessa dagana. Það kæmi mér að minnsta kosti alls ekkert á óvart hehe.
Þess vegna ætla ég að bæta við lið hérna vinstra megin þar sem sparnaðarráðin verða geymd en alls ekki gleymd!

Það veitir bara ekkert af að minna sjálfan sig á hvað maður getur gert til að minnka útgjöldin.. sérstaklega ef það þarf lítið eða ekkert fyrir því að hafa.
Öll sparnaðarráð frá ykkur eru líka vel þegin!

Kryddbrauðið hennar mömmu

2008-11-12T13:48:00.007Z

Mmmm ilmurinn sem fyllir húsið þessa stundina er ómótstæðilegur!
Blanda af kanil.. kakó.. negul... svolítið jólalegur og hversdagslegur í senn.
Þetta er kryddbrauðið sem elsku mamma bakaði svo oft þegar við vorum lítil og gerir líklegast enn!

Svona bakstur hentar öllum! Einfaldur, fljótlegur og þægilegur. Ég sver það, það getur enginn verið lengur en örfáar mínútur að skella þessu í ofninn.
Hráefnin eru líka eitthvað sem er aaalltaf til.

Kryddbrauðið endist ágætlega og er langbest með íslensku smjöri.
Það er líka tilvalið að skella því í frystinn, en það er bara svo fljótlegt að baka það að ég myndi sjálf frekar kjósa að baka það í hvert sinn.

Innihald:
3 dl hveiti
3 dl haframjöl
2 dl sykur
2,5 dl mjólk
2 tsk kakó
2 tsk natron (eða lyftiduft)
2 tsk kanill
1/2 tsk engifer
1/2 tsk negull

Aðferð:
Smyrjið ílangt kökuform (brauðform) eða klæðið að innan með bökunarpappír.
Blandið öllu nema mjólkinni saman í skál.
Hrærið mjólkinni saman við og hellið deiginu yfir í kökuformið. Ath. deigið á að vera blautt.
Bakist við 175°c í ca 40 mínútur, eða þar til deigið losnar frá forminu.

Fylltur kjúklingur á ítalska vísu

2008-11-10T09:40:00.003Z

Þetta var laugardagsmaturinn hér á bæ, ljúffengur að sjá ekki satt?
Kjúklingurinn er ekki fylltur eins og kalkúnn, heldur er fyllingunni stungið undir húðina og þannig verður kjúklingurinn safaríkur og bragðgóður. Það er hægt að komast undir skinnið á milli læranna og áður en hann er fylltur, er gott að fara fyrst með höndina inn undir skinnið og lyfta skinninu frá allri bringunni til að að vera viss um að það sé engin fyrirstaða fyrir mjúku fyllinguna. Einnig er auðvelt að rífa smá gat frá bringu yfir á lærin svo að fyllingin nái líka til þeirra.

Núna á þessum síðustu og verstu er auðvitað al-ódýrast að kaupa heilan kjúkling, þetta er samt enginn kreppukjúklingur síður en svo, því hráefnið í fyllinguna gæti hæglega verið dýrara en kjúklingurinn sjálfur!

Hráefni:

1 kjúklingur, heill

3-4 msk fersk basilíka

3 msk furuhnetur

1 hvítlauksrif

50 g ferskur parmesan, rifinn

2 msk smjör

200 g ricotta ostur (eða kotasæla)

ólífuolía

salt og pipar

Aðferð:

Maukið basilíku, furuhnetur, hvítlauk og 2 msk af ólífuolíu í mortéli eða matvinnsluvél.

Bætið ricotta ostinum, parmesan og smjöri saman við og saltið.

Troðið blöndunni inn undir skinnið, niður með öllum kjúklingnum og yfir leggina.

Klappið svo yfir kjúklinginn, þannig að blandan jafnist undir skinninu og þeki mestallan fuglinn.

Berið ólífuolíu á kjúklinginn og saltið og piprið eftir smekk.

Reynið að loka gatinu svo fyllingin leki síður út, til dæmis meðþví að krækja leggjunum saman eða með tannstönglum.

Bakið við 190°c í um 80 mínútur (eða 170°c með blæstri).

Látið fuglinn standa í um 10 mínútur áður en skorið er í hann

Mér flýgur í hug að það sé hægt að einfalda fyllinguna með því að nota grænt pestó í staðinn fyrir basilíku hvítlauk furuhnetur og ólífuolíu. En það verður kannski ekki eins gott.

p.s. talandi um kjúkling. Ég laðaðist að kjúklingahillunni í Bónus um helgina þegar ég sá merki um 50% afslátt. En 50% afsláttur segir ekki allt... því kílóverðið er komið upp úr öllu valdi... haldið þið ekki að kílóið af bringunum hafi átt að kosta heilar 3.600 krónur fyrir afslátt! Já nú ætti maður að hætta að versla þessar blessuðu bringur og halda sig við heila kjúklinginn, það er líka ekkert mál að hluta hann niður sjálfur.

Fyrsta skrifaða orðið

2008-11-08T21:33:00.003Z

Ég var svo stolt af dóttur minni í morgun.
Hún vaknaði fyrir allar aldir og var komin á ról á meðan ég var enn að berjast við þung augnlokin uppi í rúmi. Ég vissi ekkert hvað hún var að stússast, en hún kom svo að rúminu og spurði mig hvort að nafnið mitt væri ekki með tvö "A" og tvö "M" og sagðist hafa verið að skrifa nafnið mitt!
Það var ekki lítið stolt mamma sem las blaðið sem hún síðan rétti mér.

Hún veit sem sagt að ég á stafinn "H" en var á sama tíma að gera tilraun til að skrifa "MAMMA". Útkoman var síðan þessi skemmtilega blanda "HAAMM"
Dásamlegt!

Ástarfang

2008-11-08T18:46:00.003Z

Ég ætla að segja ykkur frá nýju hugtaki: "ástarfang".
Og ég mæli með því að þið tileinkið ykkur þetta í daglegu lífi eins og það er hér á bæ :)

Hún Kamilla Líf var eitt sinn að horfa á sjónvarpið með mér, ekki man ég nú svo glatt hvað var í sjónvarpinu, en það var líklegast ekki barnaefni þar sem það kom að atriði þar sem ástfangið par var í faðmlögum og kysstist innilegum frönskum kossi.

Hún bað um útskýringar á þessu háttalagi og ég sagði henni nú bara eins og var, að þetta fólk væri ástfangið. Og að ástfangið fólk kysstist svona innilega.

Hún minntist svo ekkert meira á þetta fyrr en daginn eftir. Þá faðmaði hún bróður sinn fallega, gaf honum rembingskoss á kinn og sagði "Mamma, þetta er sko ástarfang!".

Eftirleiðis eru ástarföng reglulega vinsæl og skemmtileg athöfn hér á bæ :)

Hvítlaukssaltfiskur

2008-11-06T20:52:00.003Z

Saltfiskur getur verið svooo góður, og þetta var í matinn í kvöld:

700-800 g saltfiskur
hveiti
ca 1 dl ólífuolía
16 hvítlauksgeirar, sneiddir
1 ferskur rauður chili, fræhreinsaður og sneiddur
1 msk paprikuduft
1-2 dl ólífur

Skerið saltfiskinn í jafna bita og veltið upp úr hveiti. Látið alla ólífuolíuna í djúpa pönnu og hitið vel (olían þarf að vera mjög heit). Steikið bitana og snúið þeim aðeins einu sinni (annars fer hann að hrynja í sundur), hann á að verða gullinbrúnn og stökkur. Setjið í eldfast form.

Hitið auka ólífuolíu á pönnu og létt steikið chili og hvítlauk, án þess að laukurinn brúnist. Bætið svörtu ólífunum út í ásamt paprikudufti og hrærið saman við. Dreifið þessu jafnt yfir saltfiskinn og bakið í ofni í 5 - 10 mínútur.

Meðlæti gæti verið kartöflur með smjöri (eða hvítlaukssmjöri) og paprikustrimlar.

(Chili-inu má auðvitað sleppa eða breyta magninu eftir smekk, gott með eða án)